سيسيل مكرم تكتب.. إلى حين إشعار آخر| لو هتعلمي كل أطفال العالم حاجة واحدة هتكون إيه؟

لو هتعلمي كل أطفال العالم حاجة واحدة… هتكون إيه؟

إنهم يحبوا نفسهم…
يحبوا نفسهم قبل ما العالم يقولهم إذا كانوا يستحقوا الحب ولا لأ

يعرفوا إن قيمتهم مش فى شكلهم… ولا درجاتهم… ولا عدد أصحابهم… ولا رأى الناس فيهم
يتعلموا إن الغلط مش معناه إنهم فشلوا، وإن الرفض مش معناه إن فيهم حاجة ناقصة
يعرفوا إن صوتهم مهم، وإن كلمة “لا” حق، وإن مش لازم يرضوا كل الناس علشان يبقوا محبوبين
لأن الطفل اللى بيتربى وهو شايف نفسه كفاية… بيكبر وهو أقل خوفًا، وأقل احتياجًا لإثبات نفسه، وأقل قابلية إنه يصدق أى كلمة جارحة
حب النفس مش غرور… حب النفس نجاة

ويمكن لو كل طفل اتعلم الدرس ده بدري… كان هيبكى أقل، وهيسامح نفسه أسرع، وهيعيش عمره كله وهو عارف إنه يستحق الحب… من غير ما يفضل يجرى وراه